गारव्याची प्रार्थना

फुलात धूळ शोधिता पहाड फोडतो झरा
संधिकाल थांबता शहारते जशी धरा.

भयाण गारव्यातही तुझ्या घरात ये सती
चंद्रिकाच मागते शिवालयात सद्गती...

वृक्षबीज अंगणात ही तुझी न सांगता
मठात वाचणार कोण आज रे तुझी कथा?

तुझे शरीर मंत्रफूल देहधून वैखरी;
शकून पेरणार जी पल्याडच्या निजेवरी...

स्वप्न सांध एकदाच जे उदास जाहले;
वक्षदीप तोलतील स्वस्तिकात पाउले...

सजून पाहतो तुला, तुलाच शब्द जोडतो,
उभ्याउभ्याच संग हा विषण्णतेत फेडतो.

मला स्मरून पाहणार तू तुझेच चांदणे;
मागताच संपते धुळीस धूळ मागणे...

-ग्रेस