अंगणातली रातराणी 

चिंब दहिवरात न्हाली

अन् डोळ्यांत साखळलेल्या रक्ताला 

आज पहिल्यांदाच जराशी ओल आली

वाटलं, तू नाहीस, 

तर तुझा आभास तरी ओंजळीत घ्यावा

आज अंमळ जास्तच 

हा सुवास रेंगाळावा 

झुपका तोडून ओंजळीत घेतला

आणि एक शहारा उठला

तुझ्या केसांचा स्पर्श 

परत एकदा स्मरला..

रातराणी ओंजळीत होती

पण गंध हरवला होता

कागदाच्या फुलांसारखा

एक झुपका समोर होता..

मीही बहुतेक ह्या फुलांसारखाच झालोय

तुझ्यापासून विलग होऊन गंधाला मुकलोय

 

हिरमुसलेली फुलं मला

पाहात होती टक लावून  

मोठ्या मनाने त्यांनी माफ केलं

उधारीचं हसू आणून.....

 

....रसप....